Requisitos:

Alumnado que no curso académico 2025/26 inicie ou continúe estudos postobrigatorios non universitarios en centros docentes públicos ou privados concertados situados nos termos municipais da Coruña, Culleredo, Ourense e Vigo.

No caso de centros docentes privados concertados deberá tratarse de ensinanzas e niveis incluídos no ámbito do concerto educativo.

– Requisitos persoais e académicos das persoas solicitantes de novo acceso:

1. Estar empadroada ela e os demais membros computables da unidade familiar á que pertenza nun municipio da Comunidade autónoma de Galicia; este requisito entenderase referido exclusivamente á persoa solicitante cando acredite vida independente nos termos previsto no artigo 9.2 da orde.
2. Non ter sido expulsada no curso anterior dun centro residencial docente nin estar sometida a un procedemento disciplinario en trámite por infracción das normas de réxime interno e de convivencia do centro residencial docente.
3. Estar matriculados en estudos postobrigatorios non universitarios nalgún dos centros docentes indicados no artigo 1 da orde, no curso 2025/26.
4. Non repetir curso nin ter abandonado o curso iniciado.Non obstante, o alumnado que non progresou ao curso seguinte ou abandonou o curso iniciado poderá presentar solicitude de praza de residencia unha única vez máis para cursar un estudo distinto.

Excepcionalmente por causas debidamente xustificadas, a comisión de valoración poderá eximir de forma motivada do cumprimento destes requisitos, á vista da proposta que efectúe o centro residencial e do informe da inspección educativa, para que poida continuar no centro residencial malia repetir o mesmo curso ou retomar o abandonado.

No referido aos criterios de valoración, teranse en conta os datos socioeconómicos (composición da unidade familiar, renda, discapacidade e desemprego) e o rendemento académico.

– Adxudicación de praza gratuíta.

1. Cando a renda da unidade familiar sexa igual ou inferior ao limiar 2 fixado polo Real decreto 163/2025, do 4 de marzo, do Ministerio de Presidencia, Justicia e Relacións coas Cortes, polo que se establecen os limiares de renda e patrimonio familiar e as contías das bolsas e axudas ao estudo para o curso 2025/26.
2. Cando se trate de alumnado en situación de tutela ou garda da Xunta de Galicia.

– Adxudicación de praza bonificada.

Cando a renda da unidade familiar sexa superior ao limiar 2, a persoa adxudicataria deberá aboar anualmente as seguintes cantidades: 

1. Ata un 10%: 697,87€
2. Máis do 10% e ata un 20%: 1.070.15€
3. Máis do 20% e ata un 30%: 1.717,87 €
4. Máis do 30%: 2.548,85 €

Residentes con reserva de praza:

1. As persoas residentes terán reserva de praza ata que completen os cursos dun concreto nivel educativo ou ciclo formativo que dean lugar á obtención dun título académico, sempre que non repitan curso e non variasen as demais circunstancias que se tiveron en conta para a adxudicación inicial (deben presentar na residencia o anexo I cuberto e xustificante de matrícula para o curso 2025-26).

Disposición adicional primeira. Estudos de formación profesional básica e programas de estudo ou intercambios:

Se, rematado o procedemento ordinario e, de ser o caso, o extraordinario, de adxudicación de prazas ao alumnado matriculado en estudos postobrigatorios non universitarios no curso académico 2025/26, seguen existindo prazas vacantes, poderán adxudicarse, por esta orde:

1. En primeiro lugar, ao alumnado matriculado en formación profesional básica que reúna os demais requisitos previstos nesta orde.
2. A continuación, ao alumnado que non vai asistir de forma continuada ao longo do curso escolar ás clases no centro docente en que está matriculado por seguir programas de estudo ou intercambios noutros centros.

Disposición adicional segunda. Cobertura de prazas de residencia con alumnado universitario:

1. Se rematado o procedemento ordinario e, de ser o caso, o extraordinario, de adxudicación de prazas ao alumnado matriculado en estudos postobrigatorios non universitarios no curso académico 2025/26, incluído o alumnado da disposición adicional primeira, seguisen existindo prazas vacantes, estas poderán ser cubertas con alumnado universitario.

Disposición adicional cuarta. Acceso a servizos do centro residencial por parte de estudantes non residentes:

1. As persoas estudantes incluídas na relación de suplentes e, na falta destas, as que reúnan os requisitos académicos previstos nesta orde para poder obter unha praza de residencia, poderán beneficiarse dalgún ou dalgúns servizos da residencia, sempre que exista a dispoñibilidade, logo de aboamento do seu importe.
2. Para determinar este importe teranse en conta as cantidades fixadas para as persoas residentes no artigo 13 da orde.
3. En todo caso, a utilización de calquera servizo da residencia implica a obriga de cumprir todas as normas de réxime interno e de convivencia do centro.